再講吓乜嘢叫做第四期癌

 

今日同大家傾下咩叫「第四期癌症」。好多人一聽到「第四期」就會好驚，覺得係末期，冇得醫。但其實呢個諗法已經唔合時宜，因為而家有好多新嘅治療方法，就算係第四期癌症，都有機會醫得返好，或者將佢變成一個可以長期控制嘅慢性病。

所謂「第四期」，醫學上嘅定義其實好簡單，就係指癌細胞由原本嘅地方，擴散咗去身體其他遠端嘅器官，形成「轉移」。例如前列腺癌走咗去骨，乳癌擴散到肺或者骨，又或者肺癌轉移到腦，呢啲全部都屬於第四期。

不過，將所有第四期病人都當成一樣係好籠統嘅做法。而家我哋會根據擴散嘅地方有幾多，同埋成個身體嘅腫瘤總量有幾多，去更仔細咁評估病情。近年有個好重要嘅概念叫「寡轉移」（Oligometastasis），意思係癌細胞只係擴散到好少地方，例如三到五個位，而且每一粒轉移出嚟嘅腫瘤都好細粒。如果病人屬於呢種「寡轉移」嘅情況，個治療前景其實樂觀好多。醫生可以透過好精準嘅放射治療（電療），好似「立體定位放射治療」咁，準確咁打擊晒所有擴散咗嘅腫瘤，再加埋適當嘅藥物，就好大機會可以長期控制住個病。

呢種積極嘅治療策略，我哋叫「最大程度減滅治療」（Maximal Ablative Therapy），核心思想係就算癌細胞擴散咗，我哋都要盡最大努力，用手術或者高劑量電療，去剷除所有睇得到嘅轉移腫瘤。咁做可以大大減低身體入面嘅腫瘤數量，令之後嘅藥物治療效果更加好，亦都可以減低副作用，同埋避免因為太早用晒啲勁藥而好快出現抗藥性。

除咗擴散位置嘅數目，腫瘤嘅總體積同擴散速度都好關鍵。有啲病人可能得兩三個擴散點，但其中一粒骨轉移成十厘米咁大，咁醫生就可能要用藥縮細咗粒腫瘤先，再做手術或者電療。相反，如果個病人一開始病情好穩定，過咗一兩年先慢慢出現一兩個新嘅擴散點，咁代表個癌細胞冇咁惡，用精準電療去打擊嘅效果就會好好。

當然，如果一發現嗰陣，癌細胞已經擴散到二、三十個地方，腫瘤數量非常多，治療就真係會困難好多。呢個時候，醫生就唔會諗住一次過電療晒所有地方，而係會先用啲新式藥物，好似免疫治療或者標靶藥，將成個病情控制同穩定咗先，再針對性咁處理啲剩返嘅活躍腫瘤。

所以總括嚟講，大家聽到「第四期癌症」呢個名，真係唔使即刻嚇親。醫學界對付佢嘅方法已經進步咗好多，透過仔細評估病情，結合各種先進嘅治療手段，好多病人都可以將癌症當成一個慢性病咁處理，長期共存，唔會嚴重影響到生活質素同存活期，而呢個亦正正係現代癌症治療發展嘅最大目標。

文章由臨床腫瘤科專科醫生 蘇子謙醫生撰寫